တောင်ကြီးမြို့နယ်၌ မြစိမ်းရောင်ကျေးရွာစီမံကိန်း မြို့နယ်အဆင့် သုံးသပ်ဆွေးနွေးပွဲ ကျင်းပ

တောင်ကြီးမြို့နယ်၌ မြစိမ်းရောင်ကျေးရွာစီမံကိန်း မြို့နယ်အဆင့် သုံးသပ်ဆွေးနွေးပွဲ ကျင်းပ

———————————————————————-
ဇွန်လ ၂ ရက်၊ ၂၀၂၆-နှစ်
ရှမ်းပြည်နယ်(တောင်ပိုင်း)၊ တောင်ကြီးမြို့နယ်ရှိ ပအိုဝ်းအမျိုးသားဘက်စုံဖွံ့ဖြိုးရေး (ဒဲဉ်သီႏဗွေ) ကွင်းခန်းမ၌ သမဝါယမနှင့် ကျေး လက်ဖွံ့ဖြိုးရေးဝန်ကြီးဌာန (ကျေးလက်ဒေသဖွံ့ဖြိုးတိုးတက်ရေးဦးစီးဌာန) တောင်ကြီးမြို့ နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာန က ကြီးမှူးပြီး ၂၀၂၆-၂၀၂၇ ဘဏ္ဍာရေးနှစ် မြစိမ်းရောင်ကျေးရွာစီမံကိန်း မြို့နယ်အဆင့် သုံးသပ်ဆွေးနွေးပွဲကို ဇွန်လ ၂ ရက် နံနက် ၁၀ နာရီက ကျင်းပပြုလုပ်ခဲ့ကြောင်း သိရသည်။

အခမ်းအနားတွင် ရှမ်းပြည်နယ်(တောင်ပိုင်း) ကျေးလက်ဒေသဖွံ့ဖြိုးတိုးတက်ရေးဦးစီးဌာန ပြည်နယ်ဦးစီးမှူး ဦးမောင်မောင်ဝင်းက အဖွင့်အမှာစကား ပြောကြားခဲ့ပြီး ရှမ်းပြည်နယ် စီမံကိန်းရေးဆွဲရေးဦးစီးဌာနမှ ဦးမောင်မောင်လွင်က စီမံကိန်းဆိုင်ရာ သုံးသပ်ဆွေးနွေးမှုများ တင်ပြဆွေးနွေးခဲ့ပါသည်။

ထို့နောက် စီမံကိန်းကျေးရွာများမှ ကျေးရွာလုပ်ငန်းအဖွဲ့ဝင်များက စီမံကိန်းနှင့်ပတ်သက်သည့် အကြောင်းအရာများကို အုပ်စု ၁၂ ဖွဲ့ခွဲ၍ ဆွေးနွေးခဲ့ကြပြီး အုပ်စုတစ်ဖွဲ့ချင်းစီ၏ ကိုယ်စားလှယ်များက ဆွေးနွေးချက်များကို ပြန်လည်တင်ပြခဲ့ကြသည်။

ယင်းနောက် ပြည်နယ်လွှတ်တော်ကိုယ်စားလှယ်များနှင့် တောင်ကြီးမြို့နယ် စီမံအုပ်ချုပ်ရေးအဖွဲ့ဝင် ဦးခွန်သူရအောင်တို့က အမှာစကားများ ပြောကြားခဲ့ကြသည်။ အုပ်စု ၁၂ ဖွဲ့မှ ရရှိလာသည့် ဆွေးနွေးအကြံပြုချက်များကို မြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးမှူးက သုံးသပ်တင်ပြခဲ့ပြီး မြစိမ်းရောင်ကျေးရွာစီမံကိန်း စံပြဆုရရှိသည့် ကျေးရွာများအား ဂုဏ်ပြုလက်မှတ်များ ပေးအပ်ချီးမြှင့်ခဲ့ကြောင်း သိရသည်။

တောင်ကြီးမြို့နယ်တွင် မြစိမ်းရောင်ကျေးရွာစီမံကိန်းကို ၂၀၁၄-၂၀၁၅ ဘဏ္ဍာရေးနှစ်မှ စတင်အကောင်အထည်ဖော်ခဲ့ရာ ယခုအခါ ကျေးရွာပေါင်း ၁၁၆ ရွာအထိ လွှမ်းခြုံဆောင်ရွက်လျက်ရှိပြီး စီမံကိန်းရန်ပုံငွေ ကျပ်သန်း ၅ သောင်းကျော် လည်ပတ်အသုံးပြုလျက်ရှိကြောင်း သိရသည်။

အခမ်းအနားသို့ သက်ဆိုင်ရာဌာနဆိုင်ရာ တာဝန်ရှိသူများ၊ စီမံကိန်းကျေးရွာများမှ ကျေးရွာလုပ်ငန်းကော်မတီဝင်များနှင့် ဖိတ်ကြားထားသူများ တက်ရောက်ခဲ့ကြပြီး အခမ်းအနားကို အောင်မြင်စွာ ရုပ်သိမ်းခဲ့ကြောင်း သိရသည်။