ပအိုဝ်းကိုယ်ပိုင်အုပ်ချုပ်ခွင့်ရဒေသ ဦးစီးဥက္ကဌနှင့် လွတ်တော်ကိုယ်စားလှယ်များက ဆောင်းပြောင်းကျေးရွာရှိ စာသင်ကျောင်းများ ပြန်လည်ဖွင့်လှစ်နိုင်ရေးအတွက် လာရောက်ကြည့်ရှု
မေလ (၂၆) ရက်၊ ၂၀၂၆ ခုနှစ်
အထူးဒေသ (၆)၊ ရှမ်းပြည်နယ်တောင်ပိုင်း
ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်လောင်းမြို့နယ်၊ ဆောင်းပြောင်းကျေးရွာတွင် စစ်ရေးကြောင့် ပျက်စီးသွားသော စာသင်ကျောင်းများကို ပြန်လည်ပြင်ဆင်၍ ကျောင်းဖွင့်လှစ်နိုင်ရေးအတွက် ဒေသဦးစီးဥက္ကဌ ဦးခွန်ဖိုးစိန်နှင့် လွတ်တော်ကိုယ်စားလှယ်များက မေလ (၂၆) ရက်နေ့တွင် လာရောက်ကြည့်ရှုစစ်ဆေးခဲ့ကြောင်း သိရသည်။
စစ်ရေးအခြေအနေများကြောင့် ပျက်စီးသွားခဲ့သော ဆောင်းပြောင်း အထက်တန်းကျောင်းအား ပြန်လည်ပြုပြင်နိုင်ရေးအတွက် နိုင်ငံတော်မှ ထောက်ပံ့ပေးသွားမည်ဖြစ်ပြီး၊ ကျောင်းများ အမြန်ဆုံးပြန်လည်ဖွင့်လှစ်နိုင်ရေးကိုလည်း ဆောင်ရွက်ပေးသွားမည်ဖြစ်ကြောင်း သိရသည်။
ထို့ပြင် ပန်ပုန့်၊ တောင်မဲသင်း၊ လုံးပျဉ်နှင့် နမ်းနေင်းကျေးရွာများရှိ စာသင်ကျောင်းကော်မတီအဖွဲ့များနှင့်လည်း တွေ့ဆုံဆွေးနွေးကာ ကျောင်းများ ပြန်လည်ဖွင့်လှစ်နိုင်ရေးအတွက် လိုအပ်ချက်များကို မေးမြန်းဆောင်ရွက်ခဲ့ကြောင်း သိရသည်။
ထို့နောက် တောင်လေးကျေးရွာတွင် ငလျင်ကြောင့် ပျက်စီးသွားသော နေအိမ်များအတွက် နိုင်ငံတော်မှ ထောက်ပံ့ပေးထားသည့် ငွေကြေးများကိုလည်း ပေးအပ်ခဲ့ကြောင်း သိရှိရသည်။
Leave a Reply