ဝါးပြုံးရွာတွင် ကော်ဖီစိုက်ပျိုးထိန်းသိမ်းခြင်း နည်းပညာသင်တန်းနှင့် ကော်ဖီပျိုးပင်ပေးအပ်ခြင်း အခမ်းအနား ကျင်းပ

ဝါးပြုံးရွာတွင် ကော်ဖီစိုက်ပျိုးထိန်းသိမ်းခြင်း နည်းပညာသင်တန်းနှင့် ကော်ဖီပျိုးပင်ပေးအပ်ခြင်း အခမ်းအနား ကျင်းပ

မေလ(၂၆)ရက်၊ ၂၀၂၆ ခုနှစ်၊
အထူးဒေသ(၆)၊ ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်လောင်းမြို့နယ်၊ လဲင်းတနျားကျေးရွာအုပ်စု၊ ဝါးပြုံးရွာတွင် ပအိုဝ်းကိုယ်ပိုင်အုပ်ချုပ်ခွင့်ရဒေသ ဦးစီးဥက္ကဋ္ဌနှင့် လွှတ်တော်ကိုယ်စားလှယ်အဖွဲ့၊ ပြည်နယ်၊ ဒေသ၊ မြို့နယ်နှင့် ဌာနဆိုင်ရာအဖွဲ့များ၏ ကြီးမှူးမှုဖြင့် ကော်ဖီစိုက်ပျိုးထိန်းသိမ်းခြင်း နည်းပညာသင်တန်းနှင့် ကော်ဖီပျိုးပင်ပေးအပ်ခြင်း အခမ်းအနားကို မေလ(၂၆)ရက် နံနက်(၁၀)နာရီခွဲအချိန်တွင် ကျင်းပပြုလုပ်ခဲ့ကြောင်း သိရသည်။

အခမ်းအနားအစီအစဉ်အရ ဝါးပြုံးကျောင်းဆ ရာတော်ထံမှ တရားနာယူကာ ငါးပါးသီလခံယူခဲ့ကြပြီးနောက် ပအိုဝ်းကိုယ်ပိုင်အုပ်ချုပ်ခွင့်ရဒေသ ဦးစီးဥက္ကဋ္ဌ ဦးခွန်ဖိုးစိန်က အဖွင့်အမှာစကား ပြောကြားခဲ့သည်။

ထိုသို့ပြောကြားရာတွင် ပအိုဝ်းကိုယ်ပိုင် အုပ် ချုပ်ခွင့်ရဒေသ၌ စပါး၊ ပြောင်း၊ မြေပဲ၊ ပဲပုတ်၊ နှမ်း၊ ပဲစေ့ငုံ၊ ကြံ စသည့် အဓိကသီးနှံများအပြင် ကော်ဖီ၊ လက်ဖက်နှင့် ထောပတ်သီးများကိုလည်း စိုက်ပျိုးထုတ်လုပ်လျက်ရှိကြောင်း၊ ကော်ဖီသီးနှံများကို ပြည်ပဈေးကွက်များသို့ တင်ပို့ရောင်းချလျက်ရှိပြီး ၂၀၂၅-၂၀၂၆ ဘဏ္ဍာနှစ်တွင် တန်ချိန် (၂၀၀.၅) တန်အထိ တင်ပို့နိုင်ခဲ့ကြောင်း၊ ၂၀၂၆-၂၀၂၇ ခုနှစ်တွင်လည်း ပြည်တွင်းဝယ်လိုအားသာမက နိုင်ငံခြားဈေးကွက်များတွင်ပါ ဝယ်လိုအား မြင့်တက်လာနိုင်ကြောင်း ထည့်သွင်းပြောကြားခဲ့သည်။

ဆက်လက်၍ ပြည်သူ့လွှတ်တော်ကိုယ်စားလှယ် ဒေါ်နန်းရီရီဝင်းနှင့် ရှမ်းပြည်နယ်လွှတ်တော်ကိုယ်စားလှယ် ဦးခွန်ဝင်းနောင်တို့ကလည်း အမှာစကားများ ပြောကြားခဲ့ကြောင်း သိရသည်။

ထို့နောက် ရှမ်းပြည်နယ် စိုက်ပျိုးရေးဦးစီးဌာန ဒုတိယပြည်နယ်ဦးစီးမှူး ဒေါ်စန္ဒာလင်းက ကော်ဖီစိုက်ပျိုးရာတွင် အရေးကြီးသည့် အချက်များကို ရှင်းလင်းပြောကြားခဲ့သည်။
ကော်ဖီမစိုက်ပျိုးမီ ဒေသရာသီဥတုနှင့် ကိုက်ညီသည့် မျိုးစေ့များကို ရွေးချယ်စိုက်ပျိုးသင့်ကြောင်း၊ အရိပ်ပင်များကို ကြိုတင်စိုက်ပျိုးထားသင့်ကြောင်း၊ မြေဆီမြေဩဇာများကို စနစ်တ ကျ အသုံးပြုသင့်ကြောင်းနှင့် ပိုးမွှားရောဂါများကိုလည်း အထူးဂရုပြုကာ ကာကွယ်ထိန်းသိမ်းသင့်ကြောင်း ဆွေးနွေးပြောကြားခဲ့သည်။

ယင်းနောက် ကော်ဖီပျိုးပင်များ၊ စိုက်ပျိုးရေးမျိုးစေ့များနှင့် စိုက်ပျိုးရေးသုံးပစ္စည်းများကို ပေးအပ်ခဲ့ကြပြီး ဝါးပြုံးရွာ ဥက္ကဋ္ဌက ကျေးဇူး တင်စကား ပြန်လည်ပြောကြားခဲ့သည်။
ထို့ပြင် နောင်တောင်ပရဟိတတပ်ဦးကျောင်းတွင် ကျင်းပပြုလုပ်ခဲ့သည့် ပအိုဝ်းစာပေနှင့် ယဉ်ကျေးမှု “ထွားဗား တဲင့်သေ” ဘာသာရပ်တွင် တတိယဆုရရှိခဲ့သော နန်းဝင်းနီနှင့် နန်းရွှေပွင့်လွှာတို့အား စန္တားခမ်းကော်မတီအဖွဲ့က ဂုဏ်ပြုဆုချီးမြှင့်ခဲ့ကြောင်း သိရသည်။

အခမ်းအနားကို နေ့လယ်(၄)နာရီခွဲအချိန်တွင် ရုပ်သိမ်းခဲ့ပြီး အခမ်းအနားသို့ ပအိုဝ်းကိုယ်ပိုင်အုပ်ချုပ်ခွင့်ရဒေသ ဦးစီးဥက္ကဋ္ဌနှင့် လွှတ်တော်ကိုယ်စားလှယ်များ၊ ပြည်နယ်၊ ဒေသ၊ မြို့နယ်၊ ဌာနဆိုင်ရာအဖွဲ့များနှင့် ဒေသခံပြည်သူများ စုစုပေါင်း (၂၀၀)ကျော် တက်ရောက်ခဲ့ကြောင်း သိရှိရသည်။