ပေါမူပရိယတ္တိလိတ်သွဥ်တွိုက်ကို မာꩻလွေꩻ အငဝ်းမဆွိုးအွီႏနွိုး ပဌာန်ꩻ ရွစ်ပူႏဇောႏပွယ်ꩻ
———————————————————————-
မေလာ ၂၅ နီꩻ၊ နေင်ႏ၂၀၂၆-ဗာႏ၊
ဖြောဝ်ꩻခမ်းနယ်ႏအခဝ်နဝ်ꩻ၊ ဝေင်ꩻနယ်ႏတောင်ႏကီꩻ၊ အွိုင်ႏပေါမူ ၊ ကျောင်ꩻပေါမူပရိယတ္တိလိတ်သွဥ်တွိုက်ကို သာႏသနာႏနေင်ႏ ၂၅၇ဝ၊ ကောႏဇာႏနေင်ႏ ၁၃၈၈-ဗာႏ၊ ဒဲဥ်စေတ်ꩻလာဆန်ꩻ (၁၀)နီꩻ မွူးရဝ်ꩻခိုႏ (၉:၀၀)နားရီႏအခိန်ႏ မာꩻလွေꩻ အငဝ်းမဆွိုးအွီႏနွိုး ပဌာန်ꩻ ရွစ်ပူႏဇောႏပွယ်ꩻ နဝ်ꩻသွူ။
ပွယ်ꩻပူႏဇောႏရွစ်ပဌာန်ꩻပွယ်ꩻယို ရီးသွတ်ꩻဆရာႏတကာႏ ရွစ်သွိုညီႏဝင်ꩻ နမော တဿ ဂါထာႏသွံလဲင်ႏထွူ ဗွောင်လွေꩻအခန်ꩻအနာꩻတဲင် ပရိတ်သတ်တကာႏအမျာꩻ နေးထူႏနာႏခံႏထင်ႏလွေꩻ သရဏဂွုံႏ သွံပါꩻ တွမ်ႏ သဥ်သီႏလငတ်ꩻပါꩻ ဗွေႏဆရာႏတောႏကျောင်ꩻတွိုက်တန်ပေါမူထျꩻထွူ နာႏထူႏလွေꩻသွုပ် ပရိတ်မေတ္တာႏတရာꩻနောဝ်ꩻသွူ။
အဝ်ႏနဝ်ꩻထွူ ကပင်ႏကျွꩻလွဥ်ဒါႏ ဗွေႏရဟန်ꩻသံႏဃာႏတောႏသီး ဖတ်ပူႏဇောႏသွုပ်ငါလွေꩻ ပဌာန်ꩻပစ္စယနိဒ္ဒေသ တဲင် အလဲ့ꩻကထဲ့ဒါႏ ဗွေႏသံႏဃာႏတောႏဖုံႏနဝ်ꩻ အဝ်ႏရွစ်ဖတ်ပူႏဇောႏလွေꩻနဝ်ꩻသွူ။ ပွယ်ꩻပူႏဇောႏပဌာန်ꩻယို တယ်ႏဒဲဥ်စေတ်ꩻလာဆန်ꩻ(၁၀)နီꩻ ဗꩻလွေꩻ လာဆန်ꩻ(၁၄)နီꩻအကျောင်ꩻ သေထွꩻဗာႏနဝ်ꩻသွူ။
ပွယ်ꩻပူႏဇောႏရွစ်ပဌာန်ꩻပွယ်ꩻယို စွုမ်ႏနေင်ႏအဝ်ႏအွဥ်ႏလွေꩻအကျောင်ꩻ သွူတကာႏတဝ်း လာဒဲဥ်စေတ်ꩻဗွေနီꩻနဝ်ꩻ အီႏမာꩻလွေꩻပါ ပွယ်ꩻဗုဒ္ဓပူဇနိယ ပွယ်ꩻနေင်ႏစဲဥ်ႏ၊ လာလောင်း(၁)နီꩻနဝ်ꩻ ပရိယတ္တိသွဥ်လိတ် အောင်ႏ ဗွေႏရဟန်ꩻသံႏဃာႏတောႏ၊ ဘွဲ့လꩻ/သက္ကသိုလ်ႏနွို့ခွင်ꩻလꩻ ကျောင်ꩻသားမူႏခိုတွမ်ႏ ခမ်းသဲင်လာ သွဥ်ထူႏလိတ်ပအိုဝ်ႏအောင်ႏကျောင်ꩻသာႏပေႏဖုံႏယို အီႏအောင်ႏဆုꩻလွေꩻဖေႏ ဂွုဏ်ႏထူꩻမတ်တန်ꩻဖုံႏအကျောင်ꩻသေထွꩻဗာႏနဝ်ꩻသွူ။
တယ်ႏလာလောင်း(၁)ဟာ ဗꩻလွေꩻ လာလောင်း( ၂)နဝ်ꩻ အီႏအွဥ်ႏလွေꩻ ပအိုဝ်ႏယိုꩻယာႏ အကျူႏပဒေႏသာႏ အဒုံႏအအူဖုံႏတဲင် ပါတွမ်ႏ ပအိုဝ်ႏအနုပညာႏ အရွစ်ယံဖုံႏ အီႏမွန်းပျောႏလွေꩻဖေႏအကျောင်ꩻ သေထွꩻဗာႏနဝ်ꩻသွူ။
Leave a Reply