နောင်တောင်ꩻပရဟိတတပ်ဦးဗွေႏဗွန်အွဉ်သွဉ်ပညာႏရေꩻကျောင်ꩻကို ပထမ အလဲင်ႏ မာꩻလွေꩻ လိတ်ပအိုဝ်ႏကျောင်ꩻသား မော့ꩻခွဲးပွယ်ꩻတွမ်ႏ လိတ်စေပွယ်ꩻ
———————————————————————
မေလာ ၂၀ နီꩻ၊ နေင်ႏ ၂၀၂၆-ဗာႏ၊
ပအိုဝ်ႏနမ်းပဲင်ႏအုပ်ချွုတ်ခွင်ꩻလꩻဒေႏသ၊ ဝေင်ꩻဟိုပုံꩻ၊ နောင်တောင်ꩻပရဟိတတပ်ဦးဗွေႏဗွန်အွဉ်သွဉ်ပညာႏရေꩻကျောင်ꩻကို သာသနာႏ နေင်ႏ ၂၅၇ဝ ဗွေ၊ ကောႏဇာႏသက္ကရာဇ်- ၁၃၈၈ ဗာႏ၊ မေလာ ၂၀ နီꩻ၊ ၂၀၂၆-ဗာႏနေင်ႏ ပထမလဲင်ႏ မာꩻလွေꩻ လိတ်ပအိုဝ်ႏကျောင်ꩻသား မော့ꩻခွဲးပွယ်ꩻတွမ်ႏ လိတ်စေပွယ်ꩻ အကျောင်ꩻသေထွꩻဗာႏနောဝ်ꩻသွူ။
ပထမလဲင်ႏ မာꩻလွေꩻ လိတ်ပအိုဝ်ႏကျောင်ꩻသား မော့ꩻခွဲးပွယ်ꩻတွမ်ႏ လိတ်စေပွယ်ꩻယို တယ်ႏစ ဒဲဉ်စေတ်ꩻလာဆန်ꩻ (၁) နီꩻ ဗꩻလွေꩻ ဒဲဉ်စေတ်ꩻလာဆန်ꩻ (၇) နီꩻအကျောင်ꩻ၊ ဟန်ႏနီꩻ လိတ်ပအိုဝ်ႏကစေလွေꩻဒါႏ ကျောင်ꩻသားမူႏဖုံႏယို အောဝ်ႏအဖြာꩻပေါင်ꩻ (၁၀၀၀)တရေင်လွိုအကျောင်ꩻ သေထွꩻဗာႏနဝ်ꩻသွူ။
အဓိက ကအဝ်ႏသွဥ်လွေꩻဒါႏ လိတ်ပအိုဝ်ႏယိုနဝ်ꩻလိတ်မွူး ပထမရန်း၊ လိတ်မွူး ဒုတိယရန်း၊ မင်္ဂလာႏဗိုလ်တုဲင်၊ ဇာတ်ဝတ္ထုအမုဲင် (၉)၊ ဓမ္မပဒ အမုဲင်ꩻ(၇) ၊ အင်္ဂုတ္ထိရ်ႏ အမုဲင်(၃)၊လောကတွမ်ႏဗုဒ္ဓ၊ ဇာတ်ဝတ္ထုအမုဲင် (၂)၊ ဓမ္မပဒ အမုဲင်ꩻ(၅) အင်္ဂုတ္ထိရ်ႏ အမုဲင်(၂) စတဲင် ဘာႏသာႏဖုံႏယို ကျောင်ꩻဆရာႏ/ဆရာႏမူႏသီး အဝ်ႏသွဥ်လွေꩻဖေႏကျောင်ꩻ သေထွꩻဗာႏသွူ။
နောဝ်ꩻမꩻ လိတ်ပအိုဝ်ႏကျောင်ꩻသား မော့ꩻခွဲးပွယ်ꩻတွမ်ႏ လိတ်စေပွယ်ꩻထွူခိန်ႏ မွူးယာခိုႏအခိန်ႏ နဝ်ꩻ အဝ်ႏအွဥ်ႏလွေꩻပါ ထာꩻအုံပဆိုးတွမ်ႏ မွူးလင်ꩻနဝ်ꩻအွဥ်ႏလွေꩻ အကျူႏပဒေႏသာႏတွမ်ႏ မွန်းပျောႏရေꩻအကျောင်ꩻ ဒဲဉ်စေတ်ꩻလာဆန်ꩻ(၇)နီꩻနဝ်ꩻ အီႏဖေႏအပ်လွေꩻ ကျောင်ꩻသားထင်ယံလွိုဆုꩻ အခန်ꩻအနာꩻ အကျောင်ꩻ သေထွꩻဗာႏနဝ်ꩻသွူ။
ကအွဥ်ႏထွာလွေꩻဗာႏ လိတ်ပအိုဝ်ႏကျောင်ꩻသား မော့ꩻခွဲးပွယ်ꩻတွမ်ႏ လိတ်စေပွယ်ꩻ ရေႏရွယ်ႏချက်ယို ” နီစွိုးခွိုꩻနီလိတ်လုဲင်ꩻ နီအနာႏဂတ်ယိုနဝ်ꩻ အဝ်ႏဒျာႏလိုꩻပေႏအလောင်း၊ နီစွိုးခွိုꩻနီလိုꩻဖေႏကမွန်ဗန်နဝ်ꩻ လိတ်လုဲင်ꩻမွန်ဗန်မꩻ စွိုးခွိုꩻလိုꩻမျိုꩻမွန်ဗန်၊ ခမ်းသဲင်လာကအဝ်ႏသွဥ်ထူႏဒါႏလိတ်ပအိုဝ်ႏကျောင်ꩻသားဖုံႏယို ခွေဒုံနာꩻဒုံ ခွေရပ်နာꩻရပ် သွဥ်ထူႏနွောင်ꩻသွူတကာႏတဝ်းတွော့ꩻ တနယ်ႏလွုမ်းစုပေါင်ꩻ တဒေႏသလွုမ်းစုပေါင်ꩻဝင်ꩻတဲင်တွော့ꩻ စုပေါင်ꩻမာꩻညီꩻနွောင်ꩻဒါႏပွယ်ꩻယိုနောဝ်ꩻ အကျောင်ꩻပျုတွမ်ႏလိတ်ပအိုဝ်ႏကျောင်ꩻသားမော့ꩻခွဲးပွယ်ꩻယိုတဲင် ကထွာဒါႏကျောင်ꩻသားမွိုးဖါဖုံႏ လိတ်ပအိုဝ်ႏ ဆရာႏ/ဆရာႏမူႏဖုံႏ ဆဲင်ႏရာꩻတာဝွန်ႏကထူႏကိုဒါႏ ဗွေႏဗွန်ရဟန်ꩻသံႏဃာႏဖုံႏ တာႏဝွန်ႏကအဝ်ႏသားပုဂ္ဂိုလ်ႏဖုံႏယို ခွဲးညီꩻလို့ဝင်ꩻ မာꩻညီꩻလို့ဝင်ꩻ စုပေါင်ꩻအာႏရဲင်ꩻ စုပေါင်ꩻမွန်ဗန်မုꩻ လွောင်ႏဗူႏမုꩻတဲ့ ဖေႏကထွာ ရေႏရွယ်ႏလွေꩻနုဲင်းနဝ်ꩻ” တဲင် မာꩻလွေꩻဗာႏကျောင်ꩻသားမော့ꩻခွဲးပွယ်ꩻအကျောင်ꩻ သေထွꩻဗာႏနဝ်ꩻသွူ။
Leave a Reply