နေင်ႏ၂၀၂၆ဗာႏ၊ လာဇူလိုင်(၁၈)
ပအိုဝ်ႏနမ်းပဲင်ႏအုပ်ချွုတ်ခွင်ꩻꩻလꩻဒေႏသ၊ ဝေင်ꩻနယ်ႏဟိုပုံꩻ၊ လွတ်တောႏနမ်းခြောင်ꩻတင်စွိုꩻတွမ်ႏ ပအိုဝ်းစွိုးခွိုꩻအစွိုꩻ (PNO)ပါတီ ဝေင်ꩻနယ်ႏထာꩻမာꩻအမုꩻဆောင်ႏစွိုꩻ မော့ꩻခွဲးလွေꩻခမ်းသားမွိုးဖာ အွိုင်ႏမောက်ꩻမွန်ႏကျောင်ꩻတန်ထီတခုꩻကိုအကျောင်ꩻ သေထွꩻဗာႏနောဝ်ꩻသွူ။
အရီးသွတ်ꩻကန်ႏတော့ꩻလွေꩻဗွေႏဆရာႏတောႏကျောင်ꩻနောင်ဒေႏခံꩻထူႏလွေꩻပါသီႏလငတ်ꩻပါꩻထွူတဲင် ဝေင်ꩻနယ်ႏဟိုပုံꩻ ပအိုဝ်ႏစွိုးခွိုꩻအစွိုꩻ (PNO)ပါတီ ထွိုꩻဗူႏရေꩻကဲႏ ခွန်ထွန်းဖြူ ဒေါ့ꩻလွေꩻဖေႏအဗွောင်ꩻငေါဝ်ႏငွာနောဝ်ꩻသွူ။
အောဝ်ႏနောဝ်ꩻထွူ ဝေင်ꩻနယ်ႏဟိုပုံꩻ ခမ်းသားလွတ်တောႏနမ်းခြောင်ꩻတင် ခွန်ကောင်းချစ်ထွန်း၊ ခမ်းနယ်ႏလွတ်တောႏ နမ်းခြောင်ꩻတင် ခွန်ညိုမောင်တွမ်ႏ ခွန်စနေအောင်သီး ဒေါ့ꩻနယ်လွေꩻဖေႏ လွတ်တောႏအခွဲးအကျုံႏဖုံႏ၊ နေင်ႏအလွောက်ꩻကတဲမ်းထွိုꩻ စီႏမံႏကိန်ꩻအခေႏအနေႏဖုံႏ၊ နီကအောဝ်ႏလွုပ်ꩻမာꩻဒါႏဟံႏယာႏဖုံႏယို ပုံစံ(၇) ဖေႏကအောဝ်ႏ အောဝ်ႏလိုႏမာꩻငါႏအကျောင်ꩻ၊ ပွိုင်းဝွိုꩻစီꩻပွာꩻရေꩻဖုံႏယို အောဝ်ႏလိုႏဖွဲ့ဗူႏလွေꩻငါႏဒေႏသꩻအစွိုꩻအဗူႏဖုံႏအကျောင်ꩻ၊ကို ကွပ်ပွိုးစွဉ်ႏခမ်းသားမွိုးဖာသီး ယွုမ်းအံႏဖေႏအာႏလွေꩻနီသွဉ်းသီးအစွိုꩻတဲင် ထွာလွေꩻဗာႏခမ်းသားမွိုးဖာသီးနမ်းခြောင်ꩻတင်နောဝ်ꩻမꩻ ကေꩻဇူꩻတင်ႏငါႏအကျောင်ꩻ ဒေါ့ꩻခြဲင်းနယ်လွေꩻဖေႏနုဲင်းနောဝ်ꩻသွူ။
အခန်ꩻအနာꩻကို ကထင်ႏလွဉ်ဒါႏ အွိုင်ႏမောက်မွန်ႏတွမ်ႏ အွိုင်ႏနောင်ဒေႏကို ကအောဝ်ႏဒါႏ ဒုံတွိုင်ꩻ ဖြားဒုံတွမ်ႏ ဒုံကောႏမတီႏသီး ဒင်ႏနယ်လွေꩻ ကအောဝ်ႏလိုႏဒါႏ တဖူꩻ၊တထာ၊ ဖုန်းတဲင်ႏဖုံႏတွမ်ႏ ဒေႏသလွိုင်ႏကွိုန်ꩻရေꩻ အခေႏအနေႏဖုံႏအကျောင်ꩻ သေထွꩻဗာႏနောဝ်ꩻသွူ။
ပွယ်ꩻမော့ꩻခွဲးအကို ဝေင်ꩻနယ်ႏဟိုပုံꩻ ပအိုဝ်ႏစွိုးခွိုꩻအစွိုꩻ(PNO)ပါတီ ဝေင်ꩻနယ်ႏထာꩻမာꩻအမုꩻစွိုꩻဖုံႏ၊ လွတ်တောႏနမ်းခြောင်ꩻတင်စွိုꩻဖုံႏ၊ အွိုင်ႏမောက်ꩻမွန်ႏ၊အွိုင်ႏနောင်ဒေႏကိုကအောဝ်ႏဒါႏ အုပ်ချွုတ်ရေꩻကဲႏဖုံႏတွမ်ႏ ဖြားဒုံ၊ ဒုံကောႏမတီဖုံႏ၊ဒေႏသခံႏရပ်မွိုးရပ်ဖာ ထင်ႏလွဉ်လွိုꩻ(၂၀၀)လွို အကျောင်ꩻ သေထွꩻဗာႏနောဝ်ꩻသွူ။
ဗွေႏဆရာႏတောႏကျောင်ꩻနောင်ဒေႏတွက်တာႏ လိုႏရာသွုံꩻအီအတာႏ ဝေင်ꩻနယ်ႏဟိုပုံꩻခမ်းသားလွတ်တောႏ နမ်းခြောင်ꩻတင် ခွန်ကောင်းချစ်ထွန်း လှူႏလွေꩻဝတ္တုရွဉ် (၂)သိန်ꩻ၊ ခမ်းနယ်ႏလွတ်ႏတောႏ နမ်းခြောင်တင် ခွန်ညိုမောင် (၁)သိန်ꩻ၊ ထွို့ꩻဗူႏရေꩻကဲႏ ခွန်ထွန်းဖြူ (၁)သိန်ꩻအကျောင်ꩻ သေထွꩻဗာႏနောဝ်ꩻသွူ။
