ရှမ်းပြည်နယ်ဝန်ကြီးချုပ်နှင့် MSME လုပ်ငန်းရှင်များ တွေ့ဆုံ၍ လုပ်ငန်းလိုအပ်ချက်များ တွေ့ဆုံဆွေးနွေး

ရှမ်းပြည်နယ်အစိုးရအဖွဲ့၏ ကြီးမှူးမှုဖြင့် ရှမ်းပြည်နယ်ဝန်ကြီးချုပ် ဦးစိုင်းထိန်စိုးနှင့် အသေးစား၊ အငယ်စားနှင့် အလတ်စားစီးပွားရေးလုပ်ငန်း (MSME) လုပ်ငန်းရှင်များ တွေ့ဆုံဆွေးနွေးပွဲကို ယနေ့ ဇူလိုင် ၁၈ ရက် နံနက် ၉ နာရီတွင် တောင်ကြီးမြို့ရှိ မြို့တော်ခန်းမ၌ ကျင်းပပြုလုပ်ခဲ့သည်။

အခမ်းအနားတွင် ရှမ်းပြည်နယ်ဝန်ကြီးချုပ် ဦးစိုင်းထိန်စိုးက အဖွင့်အမှာစကား ပြောကြားပြီး MSME လုပ်ငန်းများသည် ဒေသစီးပွားရေးဖွံ့ဖြိုးတိုးတက်ရေး၊ အလုပ်အကိုင်ဖန်တီးပေးရေးနှင့် ပြည်တွင်းထုတ်ကုန်များ တိုးမြှင့်ထုတ် လုပ်နိုင်ရေးအတွက် အရေးပါကြောင်း ပြောကြားကာ လုပ်ငန်းရှင်များအနေဖြင့် တွေ့ကြုံနေရသည့် အခက်အခဲများနှင့် လိုအပ်ချက်များကို ပွင့်လင်းစွာ တင်ပြဆွေးနွေးကြရန် တိုက်တွန်းပြောကြားခဲ့သည်။

ထို့နောက် Unique Lawksauk Mango Co., Ltd. မှ ဦးမြင့်ဦး၊ ရှမ်းတောင်ဆန်စက်အစုအဖွဲ့မှ ဦးလင်းအောင်၊ ရှမ်းတောင်လူငယ်စွန့်ဦးတီထွင်စွမ်းဆောင်ရှင်များအသင်းမှ ဦးခွန်မျိုးမြင့်ဦး၊ ဟဲဟိုးအာလူးအစုအဖွဲ့မှ ဦးအောင်သန်းကျော်၊ နောင်တရားအာလူးအစုအဖွဲ့မှ ဦးခွန်ဆန်းဦး၊ “ရှမ်းသူကြီး” စားသောက်ကုန်ထုတ်လုပ်ငန်းမှ ဦးတင်ဝင်းထိုက်နှင့် “နောင်ခမ်း” ကော်ဖီလုပ်ငန်းမှ ဦးခွန်မျိုးညွန့်တို့က မိမိတို့လုပ်ငန်းများ ဆောင်ရွက်ရာတွင် ကြုံတွေ့နေရသည့် အခက် အခဲများ၊ လိုအပ်ချက်များနှင့် အကြံပြုချက်များကို အသီးသီး တင်ပြဆွေးနွေးခဲ့ကြသည်။

လုပ်ငန်းရှင်များ၏ တင်ပြချက်များအပေါ် ပြည်နယ်ရဲတပ်ဖွဲ့၊ ပြည်နယ်စီမံကိန်း၊ စီးပွားရေးနှင့် ဘဏ္ဍာရေးဝန်ကြီး၊ ပြည်နယ်မြေစာရင်းဦးစီးဌာန၊ မြန်မာ့စီးပွားရေးဘဏ်၊ ပြည်နယ်စားသုံးသူရေးရာဦးစီးဌာန၊ ပြည်နယ်စက်မှုကြီးကြပ်ရေးနှင့် စစ်ဆေးရေးဦးစီးဌာန၊ ပြည်နယ်လူငယ်ရေးရာဦးစီးဌာန၊ ပြည်နယ်အထွေထွေအုပ်ချုပ်ရေးဦးစီးဌာနနှင့် ပြည်နယ်စိုက်ပျိုးရေးဦးစီးဌာနတို့မှ တာဝန်ရှိသူများက သက်ဆိုင်ရာကဏ္ဍအလိုက် ပြန်လည်ရှင်းလင်းဖြေကြားခဲ့ကြသည်။

ယင်းနောက် ရှမ်းပြည်နယ်ဝန်ကြီးချုပ် ဦးစိုင်းထိန်စိုးက လုပ်ငန်းရှင်များ၏ တင်ပြချက်များအပေါ် ပြန်လည်သုံးသပ်ဆွေးနွေးခဲ့ပြီး သက်ဆိုင်ရာဌာနများအနေဖြင့် ဥပဒေ၊ လုပ်ထုံးလုပ်နည်းများနှင့်အညီ လိုအပ်သည်များကို ညှိနှိုင်းပူးပေါင်းဆောင်ရွက်ပေးရန်၊ MSME လုပ်ငန်းများ ပိုမိုဖွံ့ဖြိုးတိုးတက်လာစေရေးအတွက် အစိုးရနှင့် ပုဂ္ဂလိကကဏ္ဍတို့ အနီးကပ်ပူးပေါင်းဆောင်ရွက်သွားကြရန် တိုက်တွန်းမှာကြားခဲ့သည်။

ထို့နောက် အခမ်းအနားကို ရုပ်သိမ်းခဲ့ပြီးရှမ်းပြည်နယ်ဝန်ကြီးချုပ် ဦးစိုင်းထိန်စိုးနှင့် ပြည်နယ်ဝန်ကြီးအဖွဲ့အများက MSME လုပ်ငန်းရှင်များ အား ရင်းရင်းနီးနီး လိုက်လံနုတ်ဆက်ခဲ့ကြကာ တွေ့ဆုံဆွေးနွေးပွဲကို အောင်မြင်စွာ ပြီးဆုံးခဲ့ကြောင်း သိရသည်။