ဖေႏကသွဥ်ထူႏနွောင်ꩻ ပအိုဝ်ႏဘီအေအတန်ꩻတွမ်ႏ အမ်အေအတန်ꩻနဝ်ꩻ ဗွေႏသံႏဃာႏသီးအွဥ်ငါခြိ့ꩻထူႏ မာꩻလွေꩻ နောင်တောင်ꩻ ဗုဒ္ဓကောလိပ် ပညာႏရေꩻ ပွယ်ꩻအုံကွံ

အထူꩻဒေႏသ(၆)၊ ပအိုဝ်ႏနမ်းပဲင်ႏအုပ်ချွုတ်ခွင်ꩻလꩻဒေႏသ/ ဝေင်ꩻဟိုပုံꩻ နောင်တောင်ꩻ ဗုဒ္ဓကောလိပ်ကို ဖေႏကသွဥ်ထူႏနွောင်ꩻ ပအိုဝ်ႏဘီအေအတန်ꩻတွမ်ႏ အမ်အေအတန်ꩻနဝ်ꩻ ဗွေႏသံႏဃာႏတောႏတန်သီးယို ဟန်ႏနီꩻ သာႏသနာႏနေင်ႏ- ၂၅၇ဝ- ဗာႏ၊ ကောႏဇာႏနေင်ႏ- ၁၃၈၈- ဗာႏ ခရစ်နေင်ႏ ၂ဝ၂၆ ပထမဝါႏဆိုႏလာလောင်း (၆) နီꩻ မွူးနီꩻ တနင်ꩻနွေႏ (၅/၇/၂၀၂၆)နီꩻနဝ်ꩻ အွဥ်ငါခြိ့ꩻထူႏ မာꩻလွေꩻ နောင်တောင်ꩻ ဗုဒ္ဓကောလိပ် ပညာႏရေꩻပွယ်ꩻအုံကွံ နဝ်ꩻသွူ။

ကမာꩻလွေꩻဗာႏ နောင်တောင်ꩻ ဗုဒ္ဓကောလိပ် ပညာႏရေꩻ ပွယ်ꩻအုံကွံအင်းမိုးချက်နဝ်ꩻ “ခေတ်ပညာႏတွမ်ႏ ဓမ္မအစွန်ꩻအထီ ပေါင်ꩻဆွိုက်ထွူတဲင် စွိုးခွိုꩻ လိုꩻမျိုꩻ ဘာႏသာႏ သာႏသနာႏအမွီႏဖုံႏယို ရက်အွဥ်ႏတန်ႏဖိုꩻဒါႏ ပုဂ္ဂိုလ်ႏထွာထွူတဲင် ယံဖေႏနေးထွာလွဥ် လိုꩻယေန်ႏကေႏ အလွောင်ႏအဗူႏစွိုꩻ”နောဝ်ꩻမꩻ မာꩻလွေꩻထွာဗာႏ ပွယ်ꩻအုံကွံအကျောင်ꩻ ဗွေႏဆရာႏတောႏ ကျောင်ꩻနောင်တောင်ꩻ ဒေါ့ꩻလဝ်းလွေꩻ နယ်ဖေႏနုဲင်းယို နောဝ်ꩻသွူ။

နဝ်ꩻထွူ နောင်တောင်ꩻဗုဒ္ဓကောလိပ်ကထိက ဗွေႏနာရဒ ဒေါ့ꩻခြုံင်းနယ်လွေꩻဖေႏ ဗုဒ္ဓ ဓမ္မ ဒီပလိုမာတန်ꩻ၊ ဗုဒ္ဓ ဓမ္မ လောကဟိတ ဘီအေတန်ꩻတွမ်ႏယိုခါ ပအိုဝ်ႏဘီအေတန်ꩻ ကအဝ်ႏသွဉ်ထူႏထွူလဲဉ်းဒါႏ လိတ်ဘာႏသာႏတွမ်ႏ သွဉ်ထူႏပွုံႏစံႏ အနယ်ꩻဖုံႏနဝ်ꩻသွူ။

တသွုပ်ချင်ႏ ဗွေႏဆရာႏတောႏကျောင်ꩻနောင်တောင်ꩻ ဒေါ့ခြုဲင်းနယ်လွေꩻဖေႏ ကမဲဉ်ဗွောင်လွေꩻဒါႏ (အမ်အေ) တန်ꩻအကျောင်ꩻခရာႏထွူ

ပွိုင်းဝွို့တွမ်း အမ်အေ တန်ꩻပညာႏရေꩻအတာႏ ထွာထွိုက်ထွာသင်ꩻနုဲင်းမုဲင်ꩻ၊ အဝ်ႏလိုႏမာꩻနုဲင်းမုဲင်ꩻ၊ မာꩻအပွုံႏမုဲင်ꩻ၊ ဘာႏသာႏဖုံႏယို အွဉ်ႏထွော့လွေꩻဗာႏနုဲင်းမုဲင်ꩻ စစွဥ်ႏအနယ်ꩻဖုံႏယို ဒေါက်တာ ပဝရ ဒေါ့ꩻခြုဲင်းနယ်ဖေႏကျံႏဉာဏ်ႏလွေꩻနုဲင်းနဝ်ꩻသွူ။

ဟန်ႏနီꩻ ပွယ်ꩻအုံကွံကို ကကျွꩻထင်ႏလွဥ်ဒါႏ ဗွေႏသံႏဃာႏတောႏတန်သီး ကဆွေꩻနွေꩻအုံကွံ ခြိ့ꩻထူႏလွေꩻဒါႏ နောင်တောင်ꩻဗုဒ္ဓကောလိပ် ပအိုဝ်ႏလိတ်လုဲင်ꩻပညာႏရေꩻအတာႏယို လိုꩻကထန်ႏတရတ်ဒါႏလိတ်အိန်ကျောင်းသား၊ ၁၂ တန်ꩻထွူလဲဥ်းသား၊ ပုဂ္ဂိုလ်ႏလိုꩻကျောင်ꩻ/သီႏလဗွာ အတန်ꩻတန်ထွူလဲဥ်းသားဖုံႏလဲ့နဝ်ꩻ တယ်ႏစွဥ်ႏ လိတ်တန်ꩻအခေႏခံႏအရန်းရန်းတဲင် ဖေႏကသွဥ်ထူႏနွောင်ꩻပါ ပအိုဝ်ႏ(ဘီအေ)ဘွဲ့အတန်ꩻတွမ်ႏ (အမ်အေ)ဘွဲ့အတန်ꩻဖုံႏ၊ ဖေႏကထဲမ်သော့ꩻပါနွောင်ꩻလိတ်ပအိုဝ်ႏစခါ၊ ငိမ်ꩻချံꩻရေꩻ(ခွꩻစုံရျူႏ)ဘာႏသာႏ စစွဥ်ႏအစွိုးစွိုးအဒဝ်ႏဒဝ်ႏဖုံႏယို အုံကွံဆွေꩻနွေꩻတွိုင်ႏပင်ႏလွေꩻ အကျောင်ꩻအခရာႏနုဲင်းနဝ်ꩻသွူ။