ပထမလဲင်ႏ လိတ်ပအိုဝ်ႏကျောင်ꩻသားမူႏခိုပွယ်ꩻမော့ꩻခွဲအတာႏ အုံကွံခြိꩻထူႏ
—————————-
မေလာ(၅)နီꩻ၊ ၂၀၂၆
အထူꩻဒေႏသ(၆)၊ ပအိုဝ်ႏနမ်းပဲင်ႏအုပ်ချုပ်ခွင်ꩻလꩻဒေႏသ၊ ဝေင်ꩻဟိုပုံꩻ၊ နောင်ꩻတောင်ꩻပရဟိတတပ်ဦး ဗွေႏဗွန်အွဉ် သွဉ်ပညာႏရေꩻကျောင်ꩻကို မာꩻလွေꩻ ပထမလဲင်ႏ လိတ်ပအိုဝ်ႏကျောင်ꩻသားမူႏခိုပွယ်ꩻမော့ꩻခွဲအတာႏ အုံကွံခြိထူႏပွယ်ꩻနောဝ်ꩻသွူ။
အရီးသွတ်ꩻ ရွစ်သွိုဝင်ꩻနမောတဿသွံလဲင်ႏထွူဗွောင်လွေꩻအခမ်ꩻအနာꩻ ဗွေႏဆရာႏကျောင်ꩻနောင်တောင်ꩻ ဒေါ့ꩻလွေꩻဖေႏ ပအိုဝ်ႏလိုꩻယွဲခွန်နင်ꩻသီး လွောက်ꩻခေတ်ထာꩻသေထာꩻဒါႏဖုံႏဖေႏကလွိုင်ႏကွိုန်ꩻ၊ လိတ်ပအိုဝ်ႏယိုလဲ့ စွုမ်ႏဖြာꩻဖေႏကဒါႏစဲင်း၊ ပေါင်ꩻကွိုက်သွုပ်သံႏရေꩻဖုံႏတဲ့ဖေႏကယံထဲင်း၊ သꩻဓာတ်ရေꩻရာႏဖုံႏယိုတဲ့ဖေႏကမွန်ဗန်တသေႏသေႏ၊ အထီႏသွီႏစွန်ထီထင်လိုꩻယွဲခွန်နင်ꩻသီး ဖေႏကထွာလွဉ်နွောင်ꩻအတာႏ မာꩻလွေꩻဗာႏ လိတ်ပအိုဝ်ႏကျောင်ꩻသားမူႏခို ပွယ်ꩻမော့ꩻအကျောင်ꩻ ဗွေႏဆရာႏတောႏကျောင်ꩻနောင်တောင်ꩻ မိန်းလင်ꩻဖေႏငွေါဝ်းငွါနုဲင်းနောဝ်ꩻသွူ။
အောဝ်ႏနောဝ်ꩻထွူ အခြပ်အရဲဉ်ႏပုဂ္ဂိုလ်ႏဗွေႏဣန္ဒော ဒေါ့ꩻခြုဲင်းနယ်လွေꩻဖေႏ လိတ်ပအိုဝ်ႏကျောင်ꩻသာႏခွန်နင်ꩻပွယ်ꩻမော့ꩻခွဲအတာႏ ကအီႏမာꩻလွေꩻဒါႏ ထာꩻမာꩻရဲဉ်ႏဖုံႏတွမ်ႏ စုခြွဉ်းလိုꩻတွမ်ႏ လိတ်သွဉ်ခရာႏ၊ လိတ်ဖြေႏခရာႏ၊ ခွုမ်ပဆိုးဂိမ်းခရာႏ တွမ်ႏ သွဉ်တန်ꩻသားတဖြာꩻစီႏလိုႏအပ်ချက်ဖုံႏအကျောင်ꩻခရာႏဖုံႏနောဝ်ꩻသွူ။
နောဝ်ꩻထွူတွော့ꩻ ဗွေႏဆရာႏတောႏကျောင်ꩻနောင်တောင်ꩻ စေခြုဲင်းနယ်ဖေႏယင်းကမာꩻဗာႏဒါႏ လိတ်ပအိုဝ်ႏကျောင်ꩻသားခွန်နင်ꩻပွယ်ꩻမော့ꩻခွဲ ရေႏမိုးချက်တွမ်ႏ ကကျွꩻလွဉ်ဒါႏ အုံကွံခြိထူႏပွယ်ꩻကို ရဟန်ႏသံႏဃာႏပါတွမ်ႏတကာႏလိုꩻလမ်းသီး တွိုင်ႏပင်ႏဖေႏကျံႏဉာဏ်ႏ အုံမွန်းလွေꩻဝင်ꩻ ကိစ္စအစွိုးစွိုးအဒေါဝ်ႏဒေါဝ်ႏဖုံႏနောဝ်ꩻသွူ။
အောဝ်ႏနောဝ်ꩻထွူ ထူႏသိမ်ꩻချာယင်းအခမ်ꩻအနာꩻတွော့ꩻ အုံကွံခြိထူႏပွယ်ꩻအကို လိတ်ဖြေႏဌာႏန (၈၂)ဗာႏ တာႏဝွန်ႏအောဝ်ႏပုဂ္ဂိုလ်ႏသီး ကျွꩻထင်ႏလွဉ်ဝင်ꩻနောဝ်ꩻသွူ လိတ်ပအိုဝ်ႏကျောင်ꩻသားမူႏခိုခွန်နင်ꩻ ပွယ်ꩻမော့ꩻခွဲယို အီႏအွဉ်ႏလွေꩻ နေင်ႏ ၁၃၈၈ ဗာႏ၊ ဒဲဉ်စေတ်ꩻလာဆန်ꩻ(၁)နီꩻ ဗꩻတွိုႏ ဒဲဉ်စေတ်ꩻလာဆန်ꩻ(၇)နီꩻအကျောင်ꩻသေထွꩻဗာႏနောဝ်ꩻသွူ။
Leave a Reply