ဗွေႏဆရာႏတောႏဝေင်ꩻတောင်ႏကီꩻ တွမ်ႏ ဗွေႏဆရာႏတောႏ ဝေင်ꩻပင်ႏလုံကျွꩻထင်ႏဖေႏအာႏ “ဖြားတန်ကောင်ခယ်ႏ” လောကဒီပ ပညာႏရေꩻကျောင်ꩻ

ဖြောဝ်ꩻခမ်း(အခေါဝ်နဝ်)၊ မျင်ꩻမိုရ်ႏခမ်း(အခေါဝ်ကွဥ်ႏ)၊ ဝေင်ꩻနမ်းစင် ပအိုဝ်ႏရဟန်ꩻတက္ကသိုလ်ႏကျောင်ꩻသားစွိုꩻ အွဥ်ငါကတယ်ႏဆွို့ꩻဒါႏ ဖြားတန်ကောင်ခယ်ႏလောကဒီပပညာႏရေꩻကျောင်ꩻယိုဝေင်ꩻတောင်ႏကီꩻ၊ အေးစေတီပရိယတ္တိလိတ်သွဥ်တွိုက်၊ ပဓာနနာယကဗွေႏဆရာႏတောႏ ဘဒ္ဒန္တလက္ခဏသာမီဘိဝံသဝေင်ꩻတောင်ႏကီꩻ၊ ကျောင်ꩻဇယန္တောပရိယတ္တိလိတ်သွဥ်တွိုက်၊ ပဓာနနာယကဗွေႏဆရာႏတောႏ ဘဒ္ဒန္တအရိယ၊ဗွေႏနန္ဒဝံသ (နမ်းပန်ႏ) အေးစေတီလိတ်သွဥ်တွိုက်၊ ဝေင်ꩻတောင်ႏကီꩻ တွမ်ႏ ဝေင်ꩻပင်ႏလုံ၊ မြို့မကျောင်ꩻနောက်ကွတ် ပဓာနနာယကဗွေႏဆရာႏတောႏ ဘဒ္ဒန္တ ပညာဗလသီးကျွꩻထင်ႏဖေႏအာႏလွေꩻအကျောင်ꩻသေထွꩻဗာႏသွူ။

ဟန်ႏနီꩻ ဇွန်လာ− ၁၄ နီꩻ၊ မွူးနီꩻတနင်ႏနွေႏ ဗွေႏဆရာႏတောႏသီႏ ကူႏညီႏစွဥ်ꩻကြယ်ꩻလင်ꩻပါ ကျောင်ꩻအတာႏ ဝတ္ထုရွဥ် (၄) သိန်ႏဗီႏနဝ်ꩻသွူ။ ကျောင်ꩻထွာနွောင်ꩻရေꩻတာႏ ဗွေႏသံႏဃာႏသီး ကကျွꩻထင်ႏဖေႏအာႏဒါႏ “ဖြားတန်ကောင်ခယ်ႏ” လောကဒီပ ပညာႏရေꩻကျောင်ꩻယိုလဲ့ ကထွာဒါႏဗွေႏရဟန်ꩻသီးဖုံႏအလူႏဗွေႏ ဗွေႏဆရာႏတောႏသီး ကားကအဝ်ႏ နမ်းသꩻနီပါꩻ ချမ်ꩻသာႏထွူတဲင် လိုႏရာꩻဆန္ဒ ယံဗွေပြဲ့ꩻဝ သွော့အကျောင်ꩻပို့ꩻပသာလွေꩻဖေႏပါမေတ္တာႏသွူ ။

ပညာႏရေꩻကျောင်ꩻကို ယိုခါနဝ်ꩻ သံဃာႏ(၇)ပါꩻ အဝ်ႏသတင်ꩻသုံꩻလွေꩻထွူ ဗွောင်ꩻသွဥ်ပါတွမ်ႏ အင်္ဂလိပ် အခေႏခံႏအကျောင်ꩻသေထွꩻဗာႏသွူ။