ပင်လုံမြို့အနောက်တောင်ဘက်ရှိ ပန်လင်းကျောင်းတွင် “သုခသိဒ္ဓိ” နှစ်ထပ်ဆွမ်းစားကျောင်းဆောင် တက်ပွဲနှင့် အလှူတော်မင်္ဂလာ အခမ်းအနား စည်ကားသိုက်မြိုက်စွာကျင်းပ

ပင်လုံမြို့အနောက်တောင်ဘက်ရှိ ပန်လင်းကျောင်းတွင် “သုခသိဒ္ဓိ” နှစ်ထပ်ဆွမ်းစားကျောင်းဆောင် တက်ပွဲနှင့် အလှူတော်မင်္ဂလာ အခမ်းအနား စည်ကားသိုက်မြိုက်စွာကျင်းပ

မေလ ၂၈ ရက်၊ ၂၀၂၆ ခုနှစ်
ရှမ်းပြည်နယ်(တောင်ပိုင်း)၊ လွိုင်လင်မြို့နယ်၊ ပင်လုံမြို့အနောက်တောင်ဘက်ရှိ ပန်လင်းကျောင်းတွင် ၁၃၈၈ ခုနှစ်၊ နယုန်လဆန်း (၁၃) ရက်၊ မေလ (၂၈) ရက် နံနက်ပိုင်း၌ “သုခသိဒ္ဓိ” နှစ်ထပ်ဆွမ်းစားကျောင်းဆောင် ဖွင့်ပွဲ၊ ဗုဒ္ဓရုပ်ပွားတော်နှင့် ဘုရားစေတီတန်ဆောင်း အနေကဇာတင် မင်္ဂလာအခမ်းအနား၊ ကံထပ်၊ ကုဋီ၊ ရှင်ပြုအလှူတော်များနှင့် အလှူဒါနအစုစု ရေစက်ချ မင်္ဂလာအခမ်းအနားကို စည်ကားသိုက်မြိုက်စွာ ကျင်းပပြုလုပ်ခဲ့ကြောင်း သိရသည်။

အဆိုပါ မင်္ဂလာအခမ်းအနားသို့ ဖြားတန်ကောင်ခယ်ႏဗျူ ဗျူဟာမှူး ခွန်သာထွန်းနှင့် အဖွဲ့ဝင်များ၊ တာဝန်ရှိပုဂ္ဂိုလ်များ၊ ဒေသခံပြည်သူများ တက်ရောက်ခဲ့ကြပြီး သံဃာတော်များအား လှူဖွယ်ဝတ္ထုပစ္စည်းများ ဆက်ကပ်လှူဒါန်းကာ အတူတကွ ကုသိုလ်ကောင်းမှုများ ပြုလုပ်ခဲ့ကြသည်။

နံနက် (၇:၀၀) နာရီတွင် ကြွရောက်လာသော ဧည့်သည်တော်များနှင့် အလှူရှင်များအား ဧည့်ခံကျွေးမွေးခဲ့ပြီး နံနက် (၁၀:၀၀) နာရီတွင် ဆရာတော်များနှင့် သံဃာတော်များက သိမ်တော်ဝင် ကံထပ်အခမ်းအနားကို ပြုလုပ်ခဲ့ကြောင်း သိရသည်။

ထို့နောက် နေ့လယ်ပိုင်း (၂:၀၀) နာရီတွင် ပရိတ်တရားတော်များ နာယူခြင်း၊ ဗုဒ္ဓရုပ်ပွားတော်နှင့် စေတီတန်ဆောင်းအား အနေကဇာတင်ပူဇော်ခြင်း၊ ရှင်ပြုမင်္ဂလာကျင်းပခြင်းများ ပြုလုပ်ခဲ့ပြီး အလှူရှင်များနှင့် ဧည့်ပရိသတ်များက အတူတကွ ရေစက်ချ အမျှဝေကာ ကုသိုလ်ယူခဲ့ကြကြောင်း သိရှိရသည်။

အခမ်းအနားသို့ ပင်လုံဒေသခံများ၊ အနီးအနားကျေးရွာများမှ ပြည်သူများနှင့် ရပ်နီးရပ်ဝေးမှ ဖိတ်ကြားထားသော ဧည့်သည်တော်များ လာရောက်ခဲ့ကြပြီး ပန်လင်းရွာကျောင်း ဒကာ၊ ဒကာမများက ရဟန်း (၁) ပါးနှင့် ကိုရင် (၁၆) ပါးအား ကံထပ်ရှင်ပြုပေးနိုင်ခဲ့ကြောင်း သိရသည်။