မိုင်းပွန်မြို့တွင် ကျန်းမာရေးနှင့် ပညာရေးဖွံ့ဖြိုးတိုးတက်ရေးလုပ်ငန်းများကို ပြည်နယ်လူမှုရေးရာဝန်ကြီး ဒေါ်နန်းခမ်းလူ ကွင်းဆင်းကြည့်ရှုစစ်ဆေး

ရှမ်းပြည်နယ်(တောင်ပိုင်း)၊ မိုင်းပွန်မြို့တွင် ရှမ်းပြည်နယ်အစိုးရအဖွဲ့ဝင် ပြည်နယ်လူမှုရေးရာဝန်ကြီး ဒေါ်နန်းခမ်းလူသည် ရှမ်းပြည်နယ်လွှတ်တော် ဒုတိယဥက္ကဋ္ဌ ဦးစိုင်းထွန်းစိန်၊ တိုင်းရင်းသားလူမျိုးရေးရာဝန်ကြီးများ၊ ပြည်နယ်အဆင့် ဌာနဆိုင်ရာတာဝန်ရှိသူများနှင့်အတူ ဇူလိုင် ၁၄ ရက်က မိုင်းပွန်မြို့ရှိ ကျန်းမာရေးနှင့် ပညာရေးဆိုင်ရာ လုပ်ငန်းများကို ကွင်းဆင်းကြည့်ရှုစစ်ဆေးခဲ့ကြောင်း သိရသည်။

ပြည်နယ်လူမှုရေးရာဝန်ကြီးနှင့် အဖွဲ့အား လဲချားမြို့နယ် ပြည်သူ့ကိုယ်စားလှယ်(PR) ဦးခွန်ထွန်းလေးနှင့် မိုင်းပွန်မြို့ အမျိုးသမီးရေးရာအဖွဲ့တို့က နွေးထွေးစွာ ကြိုဆိုခဲ့ကြသည်။

ထို့နောက် ပြည်နယ်လူမှုရေးရာဝန်ကြီးနှင့် တာဝန်ရှိသူများသည် မိုင်းပွန်တိုက်နယ်ဆေးရုံသို့ သွားရောက်၍ မြို့နယ်ဆရာဝန်ကြီးနှင့် ကျန်းမာရေးဝန်ထမ်းများအား တွေ့ဆုံနှုတ်ဆက်ကာ ပြည်သူများအတွက် ကျန်းမာရေးစောင့်ရှောက်မှုပေးနေသည့် အခြေအနေများကို လေ့လာကြည့်ရှုခဲ့သည်။ ထို့ပြင် ဆေးရုံတက်ရောက်ကုသမှုခံယူနေသော လူနာများအား လိုက်လံအားပေး၍ အာဟာရဖြည့်အစားအစာများ ပေးအပ်ခဲ့သလို ဆေးရုံအတွက် ထောက်ပံ့ငွေများကိုလည်း လှူဒါန်းခဲ့သည်။ ယင်းနောက် တာဝန်ရှိသူများ၏ ရှင်းလင်းတင်ပြချက်များအပေါ် လိုအပ်သည်များကို လမ်းညွှန်မှာကြားခဲ့သည်။

ယင်းနောက် အမှတ်(၂)ရပ်ကွက် အခြေခံပညာအထက်တန်းကျောင်းသို့ သွားရောက်ပြီး ဆရာ၊ ဆရာမများ၊ ကျောင်းသား၊ ကျောင်းသူများနှင့် တွေ့ဆုံနှုတ်ဆက်ကာ ပညာသင်ကြားနေမှုအခြေအနေ၊ ဘာသာရပ်အလိုက် လက်တွေ့သင်ကြားမှုပြခန်းများနှင့် ကျောင်း၏ ဆောင်ရွက်ထားရှိမှုများကို လှည့်လည်ကြည့်ရှုစစ်ဆေးခဲ့သည်။

ထို့နောက် တာဝန်ရှိသူများ၏ တင်ပြချက်များအပေါ် လိုအပ်သည်များကို ပေါင်းစပ်ဖြည့်ဆည်းဆောင်ရွက်ပေးခဲ့ပြီး ကျောင်းသုံးစာရေးကိရိယာများ၊ အားကစားပစ္စည်းများ၊ လှူဒါန်းငွေများနှင့် ထောက်ပံ့ငွေများကို ပေးအပ်ခဲ့ရာ ကျောင်းအုပ်ဆရာမကြီးနှင့် တာဝန်ရှိသူများက လက်ခံရယူခဲ့ကြောင်း သိရသည်။

အဆိုပါ ကွင်းဆင်းစစ်ဆေးရေးခရီးစဉ်တွင် လွိုင်လင်မြို့နယ် ပြည်နယ်လွှတ်တော်ကိုယ်စားလှယ် ခွန်သက်နိုင်နှင့် သက်ဆိုင်ရာတာဝန်ရှိသူများက လိုက်ပါဆောင်ရွက်ခဲ့ကြကြောင်း သိရသည်။